ꄓꎸ，ꆏꈜꑽꇁꀐ！

     ꉂꇁꅉꌠꆈꌠꏣꃀꏣꑟꊈꀋ，ꀃꑍꋋꄮꇭꏤꇗꅉꃪꐛꅹ，ꉪꆈꌠꋋꁯꑌꐤꅉꌒꅉꑟꀐ。ꆈꌠꋍꏅꊌꇀꄉꅍꐥ，ꆱꇁꃨꅍꐥ，ꋍꑍꋍꉙꃅꋠꂊꈚꊸꇁꀐ。ꀉꁁꆏ，ꉪꆈꌠꋍꏅꉌꂵꈐꏭꋬꂻꈉꐨꑌꐤꅉꆊꅉꑟꀐ。ꑠꐛꅹ，ꊨꏦꉌꂵꑇꐨꎹꈹꈜꃀꋋꏢꇬ，ꉪꆈꌠꑌꀃꑍꋋꄜꆏ，ꑳꌠꏢꄖꑇꌠꐤꅉꀉꑌꅉꑟꀐ。ꑠꀉꄂꀋꉬꃅ，ꉪꆈꌠꌺꇖꊨꏦꇗꅉꁆꅉꌋꆀꅇꂷꁱꂷꉪꇬꀋꎺꇁꂯꄉꀐ。ꑠꐛꅹ，ꉪꆈꌠꌺꇖꂷꈀꐥꌠ，ꉪꊇꊨꏦꅇꂷꁱꂷꌋꆀꉪꇗꅉꁆꅉꈀꉾꀕꈧꌠꄝꇬꄡꎭꌭꈬꃅꌭꄉꄡꑟ，ꄷꀋꁧ，ꋍꋏꇈꋍꋏꃅꐔꉪꌳꃈꅿꁵꇈꑲꆀꍑ，ꋋꈨꆹꉪꑲꅉꇯꆐꃅꋭꌠ。《ꍏꉸꏓꂱꇭꉼꇭꑤꃔ》ꇖꏢꏡꌠꈐꏭ，ꊿꋅꋯꑌꃯꉻ、ꊿꋅꈲꏣꌋꆀꌅꈌꃆꂮꇬꑠꃅꅑ：“ꊿꋅꈀꐩꌠꃅꊨꏦꁱꂷꌫꄻꌠꌅꈌꐥ，ꊨꏦꐥꐩꇗꅉꌫꄻ、ꄺꀱꌠꌅꈌꐥ。”ꌕꊰꃘꏢꏡꌠꈐꏭꑌꑠꃅꅑ：“ꍏꉸꏓꂱꇭꉼꇭꊿꂷꈀꐥꌠꃅꈁꏾꃅꊨꏦꑇꇏꌊꄻꉆ。”ꑠꐛꅹ，ꉪꆈꌠꈐꏭꏢꄖꏫꑇꌠꆹ，ꆈꌠꁱꂷꌷꇈ，ꆈꌠꅇꌌꄉꏃꃅꌋꏭꈼꂟ，ꌌꏃꃅꌋꏭꍖꀴꋋꅍꆹꀋꉬꀋꉆꀐ。ꀉꁁꆏ，ꀃꑍꋋꄮꆹꀊꌃꌆꃅꄯꒉꀉꄂꀘꇬꇬꀋꇔꀐ，ꑞꃅꆏ，ꊿꄆꇅꌬꄆꅇꌬꌠꐤꅉꀉꑌꅉꑟꀐ。ꑠꐛꅹ，ꉪꆈꌠꋍꏅꑇꐨꈉꄻꐨꇬꈴꄉ，ꄆꇅꄆꅇꇬꈴꄉꉜꌠ“ꆈꌠꌒꅇ”ꋋꂷꇁꆍꊇꌋꆀꐮꂿꀐ。ꏃꃅꌋꄚ“ꆈꌠꌒꅇ”ꋋꂷꇬꈴꄉꋬꂻꄻꆈꌠꌺꇐꁵ，ꌒꃤꇤꆍꇐꄉ，ꈀꄸꑌꀑꇬꐤꅉꃪꅉꑟꅊꇈ；ꈀꄸꑌꊨꏦꐥꅍꐥꄸꈀꉾꀕꌠꇬꄉꀑꒉꑊꒉꏮꏃꃅꌋꄀ，ꉹꁌꋍꏅꎁꃅꈲꏣꎹꅊꇈ！